Valentine's အလွမ်း

အိပ်မက်တွေကိုသာ ပိုင်ဆိုင်ခဲ့တယ်
တစ်ကယ်တော့
ငါ့ဘဝက သန်းခေါင်ယံပဲဟာ

ကလေးရေ
‘‘ချစ်တယ်’’ လို့ပြောလေတိုင်း
အပြစ်ရှိတယ်လို့ ယူဆရင်
ကမ္ဘာ့လူမိုက်ကြီးများစာရင်းမှာ
ငါ့နာမည်ကို ကဗ္ဗည်းတင်လိုက်ပါ။

စက္ကန့်တွေသေနေတဲ့ နာရီတစ်လုံးလို
အနာဂတ်တွေဟာ အေးခဲဖျော့တော့
မျော်လင့်ခြင်းဆိုတာ
ဒိုင်မမြင်တဲ့ ဘောလုံးတစ်လုံးလိုပဲ
ဂိုးတိုင်နှစ်တိုင်ကြား ရောက်ခဲ့ပေမယ့်
ဂိုးမရဘူး.... ကလေးရေ။

နှင်းတွေ ငိုနေတာတောင်
ဆောင်းအိပ်မက်က မနိုးထနိုင်သေး
ငါကတော့
အလွမ်းတွေ ပင်လယ်ဖြစ်ကာမှ
ဖောင်ပျက်ခဲ့သူပါ။

အိပ်ရေးပျက်နေတဲ့ ကြယ်တွေကို
ပင်လယ်က ချော့သိပ်သလိုမျိုး
ဂန္တဝင်ဂီတနဲ့ ကခုန်နေတဲ့လမင်း
မြေပြင်ကိုဆင်းဖို့ ငြင်းသလိုမျိုး
ရိုးသားစွာ ဝေးသွားကြတော့
(ကလေးရေ)
အတိတ်ဆိုတာ ပြန်မရပေမယ့်
တမ်းတမိတိုင်း.....လွမ်းတယ်။

မင်းမွန် (ဂွမြို့)